როგორ მოვიქცეთ, როცა მოზარდი თავს არიდებს თანატოლებთან ურთიერთობას 

ის ფაქტი, რომ მოზარდი თავს არიდებს თანატოლებთან ურთიერთობას, აღარ გამოხატავს მზაობას ახალი ურთიერთობების წამოსაწყებად, იშვიათად ტოვებს სახლს და ნაკლებად საუბრობს, ბევრ მიზეზზე შეიძლება მიუთითებდეს, თუმცა ძირითად შემთხვევებში ეს მდგომარეობა დაბალი თვითშეფასებით არის განპირობებული, რაც ზემოთ აღნიშნული ქცევების მიზეზი ხდება. დაბალი და ნეგატიური წარმოდგენა საკუთარ თავზე შესაძლოა სხვადასხვა მიზეზით იყოს განპირობებული. ერთ-ერთი მნიშვნელოვანი საკითხი, რომელიც მოზარდის თვითშეფასებაზე ახდენს გავლენას, კომუნიკაციის ცვლილებებია ურთიერთობებში. მოზარდობა არის პერიოდი, როდესაც ურთიერთობები ბავშვური თამაშებიდან უფრო რთულ და ორგანიზებულ სტრუქტურაზე გადადის. ამ პერიოდში ჩნდება ახალი წესები კომუნიკაციაში, როგორიცაა: საუბრის სპეციფიკის, ფიზიკური შეხებების, ემოციების გამოხატვის, სხვისი აზრის პატივისცემის და სხვა წესები. ხშირად მოზარდები ვერ ახერხებენ ამ სირთულეებთან ადაპტაციას. მიუხედავად დიდი ძალისხმევისა, მათ შეიძლება გაუჭირდეთ თანატოლებთან საუბარში აყოლა, რაც კონფლიქტურ სიტუაციებს იწვევს. ასეთმა გამოცდილებამ შესაძლოა შექმნას განცდა: „განსხვავებული ვარ“, „ჩემთან მეგობრობა არ სურთ“, „ვერ მიტანენ“ და სხვა. შედეგად, მოზარდი თანდათან დისტანცირდება თანატოლებისგან, აღარ საუბრობს გაკვეთილებზე, აღარ გადის ეზოში და დროის უმეტეს ნაწილს საკუთარ ოთახში – „ყველაზე დაცულ ადგილას“ – ატარებს. ეს მდგომარეობა ხელს უშლის მის ჯანსაღ ფუნქციონირებას და ნეგატიურად აისახება როგორც განვითარებაზე, ასევე ცხოვრების ხარისხზე. თუ ამჩნევთ, რომ თქვენი შვილი მსგავსი მიზეზით არიდებს თავს ურთიერთობებს, მნიშვნელოვანია თანმიმდევრული და სწორი მიდგომა. აუცილებელია კომუნიკაცია დაიწყოთ ყველაზე მარტივი და უსაფრთხო ფორმით – მშობელსა და შვილს შორის საუბრით – შემდეგ თანდათან გააფართოვოთ კომუნიკაციის არეალი. გიზიარებთ რამდენიმე რჩევას: 

•  ყოველდღიური საუბრები: ეცადეთ, ხშირად, დღეში რამდენჯერმე ესაუბროთ სხვადასხვა თემაზე, რომელიც მისთვის და თქვენთვის საინტერესოა. ამ საუბარში შეაქეთ მისი აზრები, სიტყვები, შეხედულებები და სხეულის ენა. 

•  უცხო გარემოს გაცნობა: როცა თქვენთან ჯანსაღ და თავისუფალ კომუნიკაციაში შემოვა, ურთიერთობა გადაიტანეთ სახლის გარეთ – კაფეში, თეატრში, კინოში, მუზეუმში და სხვა. ამით მას უცხო გარემოს მიმართ ნდობას განუმტკიცებთ. 

•  ნაცნობი ადამიანები: ჩართეთ მისთვის უცხო, მაგრამ თქვენთვის ნაცნობი ადამიანები აქტივობებში. თუ ის დაინახავს, რომ თქვენთვის უცხო ადამიანი სანდოა, მასაც გაუადვილდება კომუნიკაცია.

•  შექება: არ დაგავიწყდეთ, ხშირად შეაქოთ მისი მცირე მიღწევებიც კი.

•  თანატოლებთან ურთიერთობა: მოიწვიეთ მეგობრების შვილები და ერთად განახორციელეთ საინტერესო აქტივობები. თანატოლებთან პოზიტიური დროის გატარება ხშირად ბუნებრივად მივყავართ ჯანსაღ ურთიერთობებამდე. 

•  სიტყვებისა და ჟესტების ახსნა: აუხსენით, რას ნიშნავს კონკრეტული სიტყვა ან სხეულის ენა. მიეცით რჩევები სახლში, მშვიდ გარემოში, ან ხმადაბლა, ისე, რომ მხოლოდ მან გაიგოს. გისურვებთ წარმატებებს! 

ავტორი: დავით ზაუტაშვილი

აღნიშნული მასალა წარმოადგენს "საქართველოს ბავშვების" ინტელექტუალურ საკუთრებას და შესაბამისი საავტორო უფლება დაცულია