ხშირად მოზარდები თანატოლებთან ურთიერთობას თავს არიდებენ, რაც იმით აიხსნება, რომ ისინი ურთიერთობისას ზედმეტ ყურადღებას ან პირიქით, უყურადღებობას იღებენ. ეს მათ თავს აგრძნობინებს არაკომფორტულად. საკუთარი თავი რომ მსგავს ურთიერთობაში წარმოვიდგინოთ, მარტივი გასააზრებელია, თუ რამხელა სტრესს განიცდის ამ დროს მოზარდი და რამდენად არაკომფორტულია მისთვის მსგავს ურთიერთობაში ყოფნა. შედეგი კი თავისთავად, არაკომფორტული გარემოსგან დისტანცირებაა. ასეთ დროს, მოზარდი, რომელიც რამდენიმე გარემოში (სკოლა, ეზო თუ სხვა...) თავს არაკომფორტულად იგრძნობს, ახალი გარემოს ნახვის და სხვა ურთიერთობების დამყარების მცდელობის სურვილს კარგავს, რაც მისი საზოგადოებისგან დისტანცირებით შეიძლება დამთავრდეს: აღარ წავიდეს სკოლაში, აღარ ჩავიდეს ეზოში, აღარ გავიდეს სახლიდან.... თუ ამჩნევთ საკუთარ შვილს, რომ თავს არიდებს სხვადასხვა გარემოს, ეს იმის ნიშანია, რომ ის თქვენს დახმარებას საჭიროებს. ამ დროს, თქვენი სწორი კომუნიკაცია, ერთერთი ყველაზე მნიშვნელოვანი ნაბიჯია.

• პირველ რიგში, თქვენ უნდა დაამყაროთ მასთან კომუნიკაცია, დაუსვათ კითხვები მის ემოციებზე, განცდებზე, გამოცდილებებზე და ასევე გაუზიაროთ საკუთარი თუ სხვათა გამოცდილებები, რომლებიც შეიძლება ურთიერთობების წარმართვაში დაეხმაროს. მან უნდა იგრძნოს თქვენი მხარდაჭერით, რომ მარტო არ არის. 

• მოახდინეთ იმ გარემოში ჩარევა, რომელ გარემოსაც თავს არიდებს: სკოლის მასწავლებელთან საუბრით, ეზოში თანატოლების მშობლებთან და სხვა... ამით თქვენ შეძლებთ შეცვალოთ მისი ურთიერთობები. გამოუვალ სიტუაციაში გარემოს ცვლილება მაგ: სკოლის შეცვლა ბევრად უკეთესია, ვიდრე არაჯანსაღ გარემოში მისი დატოვება.

• ხშირად მოზარდს მეგობრობის დაწყება ძალიან რთულ პროცესად მიაჩნია, არ იცის რა გააკეთოს, რომ თანატოლის ყურადღება მიიქციოს. ჰკითხეთ, ვისთან მეგობრობა სურს და ურჩიეთ, რა გააკეთოს ამ მეგობრობის დასაწყებად. ( შესთავაზოს თამაში, ისადილონ ერთად, დაუწეროს წერილი, აჩუქოს ნახატი, შოკოლადი და სხვა...) ეს ყველაფერი ამარტივებს თანატოლებთან კომუნიკაციაში შესვლას. 

• ჩართეთ ისეთ აქტივობებში, სადაც ახალ თანატოლებთან ურთიერთობის საშუალება ექნება: ღონისძიებებზე წასვლა, სპორტზე შეყვანა, გასართობი ცენტრები, პარკებში სეირნობა... ასეთ დროს, მოზარდი სწავლობს საკუთარ თავს სხვებთან ურთიერთობაში და იმ არაკომფორტულ შეგრძნებებთან გამკლავებას, რომელსაც ზოგიერთი ადამიანი ან გარემო აღძრავს მასში.

• ბევრი სხვადასხვა ურთიერთობის სხვადასხვა გარემოში ქონა, მას ეხმარება იპოვოს სასურველი მეგობრები და მისთვის სასიამოვნო სიტუაციები, დაისწავლოს ახალი სოციალური ქცევები და უკვე დასწავლილი ქცევების გადატანა მოახდინოს. ეს ყველაფერი მისი პიროვნული ზრდისთვის ხელშემწყობია და ამაში მშობლის მხარდაჭერა აუცილებელია.

• ყოვლედღე ესაუბრეთ მოზარდს მის ურთიერთობებზე და ემოციებზე. 

• მოახდინეთ სწორი ზემოქმედება იმ გარემოზე, რომელშიც ის იმყოფება. 

• ჩართეთ ისეთ აქტივობებში, სადაც თანატოლებთან ურთიერთობის საშუალება ექნება. 

• გაამხნევეთ, ურჩიეთ, მოუყევით ისტორიები, რომლებიც მას დაეხმარება სწორი ნაბიჯების გადადგმაში. 

ავტორი: დავით ზაუტაშვილი, ფსიქოლოგი, ქცევითი თერაპევტი 

აღნიშნული მასალა წარმოადგენს "საქართველოს ბავშვების" ინტელექტუალურ საკუთრებას და შესაბამისი საავტორო უფლება დაცულია